Հայաստանի ազգային հավաքականի գլխավոր մարզիչ Վարդան Մինասյանի օգնական, ֆիզպատրասվածության գծով հանրահայտ մասնագետ, հոլանդացիՌայմոնդ Վերհեյենիբացառիկ հարցազրույցը ArmFootball.com-ին:
— Ռայմոնդ, անկեղծ ասած Ձեր`Հայաստանի հավաքականի մարզչական շտաբում ընդգրկվելը մի փոքր անսպասելի էր: Կասկած չկա, որ դուք ավելի լավ առաջարկներ կունենայիք ավելի հայտնի թիմերից: Ի վերջո, մենք ֆուտբոլային գերտերություն չենք: Ինչպե՞ս ստացվեց, որ համաձայնեցիք գլխավորել Հայաստանի հավաքականը:
— Պատճառն այն է, որ ես միշտ առանձնահատուկ մարտահրավեր եմ որոնում: Անցյալում աշխատել եմ ֆուտբոլային հարուստ ավանդույթներ ունեցող երկրներում, և դա հրաշալի էր: Միշտ խոշոր մրցաշարերի ես մասնակցում: Այն թիմերը, որտեղ աշխատել եմ, 5 անգամ դուրս են խոշոր մրցաշարերի կիսաեզրափակիչներ: Սակայն Հայաստանը առանձնահատուկ մարտահրավեր է: Կա թիմ, որը լավ է խաղում, սակայն նրա առջև նպատակ է դրված կատարել վերջին քայլը` դուրս գալ որևէ խոշոր մրցաշարի եզրափակիչ փուլ:
Սա է պատճառը, որ ես աշխատում էի Ուելսի հավաքականում: Երբ ես գնացի այնտեղ, Հոլանդիայում շատերն էին հարցնում. «Ի՞նչու Ուելս: Նրանք երբեք չեն խաղացել աշխարհի կամ Եվրոպայի առաջնության եզրափակիչ փուլում»: Սակայն, ես գիտեի, որ Ուելսը շատ լավ երիտասարդ ֆուտբոլիստներ ունի: Եվ ես կարող էի իմ միջազգային փորձը փոխանցելով նրանց` օգնել դուրս գալ մեծ մրցաշարի եզրափակիչ: 4-5 ամիսների ընթացքում մենք ՖԻՖԱ-ի դասակարգման աղյուսակում 120-րդ տեղից բարձրացանք մինչև 40-րդ հորիզոնական: Ուելսն իսկապես առաջընթաց գրանցեց, սակայն, ցավոք, ողբերգություն տեղի ունեցավ գլխավոր մարզիչ Գարի Սպիդի հետ (Սպիդը ինքնասպանություն գործեց — ArmFootball.com): Ֆեդերացիայի հետ ծրագրած նախագիծը ընդհատվեց:
Ես զգում էի, որ պետք է նմանատիպ մի նախագիծ կյանքի կոչեմ: Եվ Հայաստանն այդ առումով ինձ համար հետաքրքություն էր ներկայացնում, քանի որ այդ թիմը նույնպես վերելքի մեջ է: Ձեր երկրի հավաքականն արդեն աշխարհի ուժեղագույն 50 հավաքականների թվում է, որը գրեթե հաղթահարել էր որակավորման փուլը: Եթե հիշենք Իռլանդիայի դեմ հանդիպումները, ապա ձեզ ընդամենը մեկ քայլ էր բաժանում Եվրոպայի առաջնության եզրափակիչ ուղեգիր նվաճելուց: Հենց դա ինձ դուր եկավ: Նաև ինձ հրապուրեց ուրիշ մշակույթով երկրում աշխատելու հեռանկարը:
— Դուք արդեն մի քանի ամիս է աշխատում եք Հայաստանի հավաքականում: Ինչպիսի՞ն են տպավորությունները ՀՖՖ-ից, հավաքականի գլխավոր մարզչից, ազգային հավաքականի ֆուտբոլիստներից:
— Ֆուտբոլիստներից ունեցած տպավորություններս հետևյալն են. դուք ունեք երիտասարդ, բավականին ունակ ֆուտբոլիստների սերունդ: Երևում է, որ նրանք հաղթանակների, հաջողությունների ծարավ են, նրանք իսկապես ցանկանում են ինչ-որ բանի հասնել: Ինչ վերաբերում է Վարդանին (Մինասյան — ArmFootball.com), ապա նա էլ հիմնականպատճառներից մեկն էր, որ ես ընտրեցի այս աշխատանքը: Որովհետև նա իր հատկանիշներով շատ նման է Ուելսի հավաքականի գլխավոր մարզիչ Գարի Սպիդին: Եվ նա էլ ցանկանում է մարզչական աշխատանքում անընդհատ կատարելագործվել, նոր բաներ սովորել:
Ես նաև խոսել եմ ձեր ֆուտբոլային միության ղեկավարի հետ (ՀՖՖ-ի նախագահ Ռուբեն Հայրապետյանի — ArmFootball.com) և զգացել եմ, որ նա ոչ միայն խոսում է, այլ նաև քայլեր է ձեռնարկում ֆուտբոլի զարգացման համար: Եթե մենք ունենում ենք առաջարկներ, դիմում ենք նրան, նա անպայման այդ հարցերում օգնում է մեզ: Որովհետև ֆուտբոլային աշխարհում շատերն են ասում` մենք կանենք, սակայն իրականում ոչնչով չեն օգնում: Եվ դա էլ պատճառներից մեկն է, որ ես այստեղ եմ գտնվում:
— Ռայմո`նդ, ասացեք, մեր հավաքականում կա՞ն թոփ-կարգի ֆուտբոլիստներ:
— Միշտ էլ վտանգավոր է խոսել առանձին ֆուտբոլիստների մասին: Բայց երկար մարզահագուստով այս տղան… (մատնացույց է անում Հենրիխ Մխիթարյանին: Վերջինս լսելով, թե ինչի մասին է խոսակցությունը, ծիծաղում է): Այ նա հենց այդպիսի ֆուտբոլիստի օրինակ է:
— Իսկ եթե համեմատենք մեր հավաքականը Լեհաստանում և Ուկրաինայում կայացած Եվրոպայի առաջնությունում հանդես եկած հավաքականների հետ: Շա՞տ ենք զիջում:
— Կարծում եմ…
— Դե եթե, օրինակ, համեմատենք նույն Ռուսաստանի հավաքականի հետ..
— Դուք խաղացել եք Ռուսաստանի հետ: Դուք կարող էիք տեսնել, որ Ռուսաստանը մեկ քայլ առաջ է: Հայաստանը սեփական հարկի տակ 0-0 խաղաց, իսկ Ռուսաստանում ռուսները բարենպաստ մրցավարության դեպքում հաղթեցին 3:1 հաշվով:Սակայն աշխատելու դեպքում Հայաստանի հավաքականը որակավորման փուլը հաղթահարելու ներուժ ունի:
— Ինչպե՞ս կբնութագրեիք Հայաստանի հավաքականի խաղաոճը: Մեր հավաքականը մարտավարական տեսանկյունից ժամանակակի՞ց ֆուտբոլ է խաղում:
— Հայաստանի հավաքականի խաղաոճը շատ վտանգավոր հակագրոհներն են, շատ արագ խաղը` 2-3 փոխանցումներով: Պետք է աշխատենք հաջող խաղալ կազմակերպված թիմերի դեմ: Պետք էշատ ուշադիր լինել, որովհետև մեր գործողություններում շտապողականություն կա, հատկապես այն դեպքում, երբ կորցնում ենք գնդակը: Եվ երբ մրցակիցը կազմակերպված է գործում, մենք պետք է ուշադիր լինենք, սպասենք մրցակցի սխալին և հետո նոր գրոհենք: Որովհետև եթե անդադար գրոհում ես, իսկ մրցակիցը հմտորեն պաշտպանվում է, ապա կարծես պատի բախվես: Նորից կրկնվեմ, պետք է ուշադիր լինել գնդակը կորցնելիս:
— Երկար ժամանակ ֆիզիկական պատրաստությունը մեր թիմի թույլ կողմն էր: Ի՞նչ վիճակ է այժմ:
— Կարծում եմ` ֆիզիկական պատրաստությունը դեռ բարելավման կարիք ունի: Սակայն, հավաքականի հետ աշխատելով, մենք չենք կարող կտրուկ բարելավել այն: Խաղացողները մեր տրամադրության տակ են լինում ընդամենը մի քանի օր: Նրանք պետք է բարելավեն իրենց ֆիզպատրաստությունը իրենց ակումբներում: Այստեղ խոսքը միայն ֆիզիկական ուժի վերականգնման մասին է:
Շաբաթ կամ կիրակի օրերին նրանք հանդիպումներ են անցկացնում իրենց ակումբներում և երկուշաբթի, երեքշաբթի օրերին դեռ նորմալ հանգստացած չեն լինում: Մենք պետք է թարմ ուժերով նրանց մոտեցնենք հավաքականի խաղերին, որպեսզի չորեքշաբթի օրերին նրանք արդեն լրիվ վերականգնված լինեն:
— Սեպտեմբերին մեկնարկում է Բրազիլիայում կայանալիք աշխարհի առաջնության 2016թ. ընտրական փուլը: Մեր հավաքականը եզրափակիչ փուլի ուղեգիր նվաճելու հնարավորություն ունի՞:
— Եթե ես չհավատայի, չէի անցնի այս գործին: Այս թիմը հնարավորություն ունի: Եթե ես չտեսնեի ոչ մի հնարավորություն, ապա պարզապես կթողնեի աշխատանքս: Ըստ էության` ես շարունակում եմ, որովհետև հավատում եմ այս հավաքականին: Ակնհայտ է, որ մեր ընտրական խումբը բոլոր խմբերից թերևս ամենաբարդն է: Մեր խմբում են Իտալիան, Դանիան, Չեխիան… Երեքն էլ մասնակցում էին Եվրո-2012-ին: Շատ ուժեղ խումբ է: Սակայն եթե Հայաստանը շարունակի առաջադիմել, ապա հնարավորություններ կունենա:
Շատ բան կորոշվի Չեխիայի ու Դանիայի հետ հանդիպումներում: Պետք է նաև փորձել անակնկալ մատուցել Իտալիայի դեմ խաղերում: Մենք պետք է հասկանանք, որ բոլոր թիմերն էլ միավորներ կկորցնեն: Եվ մրցաշարի ավարտին թիմերն ունենալու են 16-17 միավոր: Եվ հնարավոր է, որ մենք մեկ միավոր ավել լինենք մրցակցից, կամ գերազանցենք նրանց խփած-բաց թողած գնդակներով: Այսպիսի իրավիճակ պետք է կարողանանք ստեղծել ընտրական փուլի ավարտին:
— Վերջին հարցը` կապված չորեքշաբթի օրվա մեր մրցակցի`Բելառուսի հավաքականի մասին:
— Շատ ագրեսիվ թիմ է: Մենք պետք է ուշադիր լինենք փոխանցումներ կատարելիս հենց առաջին րոպեներից, որովհետև բելառուսները շատ լավ են պրեսսինգի դիմում:
Արսեն ՍԱՐԿԻՍՅԱՆ, ArmFootball.com
You must be logged in to post a comment.