Հայաստանի հավաքականի պաշտպան Լևոն Հայրապետյանը ArmFootball.com-ի թղթակցի հետ զրույցում կիսվել է 2014 թվականի ԱԱ-ի որակավորման փուլի Մալթայի և Բուլղարիայի հավաքականների դեմ արտագնա հանդիպումներից ունեցած իր ակնկալիքներով:
— Լևո´ն, ինչպիսի՞ տրամադրություն ունես Մալթայի դեմ խաղից առաջ:
— Շատ լավ տրամադրություն ունեմ, քանի որ մենք շատ լավ թիմ ունենք:
— Հավաքականում կա նորեկ` «Միկայի» պաշտպան Ալեքսը…
— Անկեղծ ասած ես Հայաստանի Բարձրագույն խմբի առաջնությանը չեմ կարողանում հետևել, քանի որ հայկական հեռուստալիքներ չունենք: Փորձում եմ համացանցի միջոցով հետևել, սակայն հենց Ալեքսի խաղերը չեմ տեսել: Բայց մի բան կարող եմ ասել, մենք բոլորս էլ նրան շատ լավ կընդունենք:
— Մալթայի դեմ խաղում պաշտպանությունու՞մ, թե՞ կիսապաշտպանությունում կխաղաս:
— Դա ժամանակը ցույց կտա: Ես կխաղամ այն դիրքում, որը կասի մարզիչը: Կարևորը ես օգուտ տամ թիմին, թե որ դիրքում դա կլինի ինձ համար այդքան էլ կարևոր չի:
— Մալթայի հավաքականի մասին ի՞նչ կասես:
— Առաջին հերթին չի կարելի Մալթային թերագնահատել, այսօրվա ֆուտբոլում հեշտ խաղեր չկան: Ինչ վերաբերվում է իրենց կազմին, կամ խաղաոճին, մարզիչները մեզ խաղից առաջ կասեն:
— Բելառուսի դեմ խաղը վատ հետևանքներ չի թողնի՞:
— Չեմ կարծում, համոզված եմ, որ մենք մեր սխալների վրա շատ բաներ կսովորենք:
— Տակտիկապես ո՞վ է ավելի ուժեղ մրցակից, Մալթա՞ն, թե՞ Բուլղարիան:
— Կարծում եմ` Բուլղարիան: Բայց էլի եմ կրկնում, չի կարելի Մալթային թերագնահատել:
— Հայաստանի հավաքականի հնարավորություններն այս ընտրական փուլում ինչպե՞ս ես գնահատում:
— Լավ, մենք գիտենք, որ ամեն ինչ մեր ձեռքերում է: Մենք խմբից դուրս գալու հնարավորություն հաստատ ունենք, բայց մինչ այդ դեռ երկար ճանապարհ պետք է անցնենք:
— Ի՞նչ կմաղթես հավաքականին և երկրպագուներին:
— Երկրպագուներին հաղթանակներ: Իսկ ֆուտբոլիստներին հաղթանակների հետ մեկտեղ առանց վնասվածքների խաղեր:
You must be logged in to post a comment.